Një ekip i KEDS-it është sulmuar dje në Prizren teksa po kryente detyrën zyrtare. Si rrjedhojë, një nga punëtorët tanë ka marrë lëndime trupore. Ai pas trajtimit mjekësor është duke u shëruar në shtëpi. Policia e Kosovës është duke u marrë me rastin.

KEDS dënon fuqishëm këtë veprim, përderisa ne si kompani presim nga organet e rendit dhe drejtësisë të kryejnë punën e tyre dhe ata që bëjnë veprime të tilla të marrin dënimin e merituar.

Rastet e tilla paraqesin pengesa të mëdha në kryerjen e detyrave për punëtorët tanë, të cilët kanë mision furnizimin me energji elektrike të qytetarëve të vendit.

Secili punëtor yni është i përkushtuar të kryejë detyrat e veta zyrtare, ndërsa presim nga të gjitha hallkat e shoqërisë që punëtorëve tanë t’ua lehtësojnë punën, pra të bashkëpunojnë për të gjitha cështjet që ndërlidhen me ta, kur dihet rëndësia jetike e furnizimit me energji elektrike për popullin, e sidomos për ekonominë e Kosovës.

Pra, KEDS kërkon nga secili konsumator që t'i kryejë detyrat dhe obligimet e veta, në mënyrë që të mos afektohet sistemi, por ai të avancohet tutje si një e mirë e përbashkët. Kjo është rruga e vetme përmes së cilës mund të ecim përpara. Rastet e tilla paraqesin vetëm vështirësi, prandaj nuk guxojnë të përsëriten më.